FIVE STARS MODERN TAARAB CHASUKWA UPYA

KIKUNDI cha taarab cha Five Stars kimewanyakua nyota wapya wa muziki huo kutoka katika vikundi mbalimbali kwa lengo la kujiimarisha.

Miongoni mwa wasanii hao wapya ni pamoja na waimbaji wakongwe, Mwanahawa Ally, Sabah Salum, Maua Tego, Mosi Suleiman na mpiga kinanda Thabiti Abdul.

Mbali na kuajiri nyota hao, kundi hilo pia limeupiga chini uongozi wote wa zamani na kuweka viongozi wapya.

Kwa sasa, kundi hilo ambalo lilitamba vilivyo mwaka juzi kabla ya wasanii wake 14 kufariki dunia kwa ajali ya gari, lipo chini ya mkurugenzi, Maalim Sharrif Mambo maarufu kwa jina la Shacks.

Wasanii wa zamani wa kundi hilo waliofariki dunia kwa ajali ni Issa Kijoti, Sheba Juma, Tizzo Mgunda, Omary Hashim, Omary Haji, Hajji Mzania, Nassoro Madenge, Husna Mapande, Hamisi Omary, Maimuna Makuka, Hassan Ngeleza, Ramadhani Maheza na Ramadhani Mohamed.

Kiongozi wa kundi hilo, Ally J aliwaambia waandisi wa habari mjini Dar es Salaam jana kuwa, wameamua kulisuka upya kundi hilo ili kuhimili ushindani wa taarab uliopo sasa.

Wasanii wengine wapya waliojiunga na kundi hilo ni Jumanne Ulaya, Yussuf Tego, Mariam Mohamed, Mariam Omary na Hammer Q.

Jay alisema wasanii hao wameingia mkataba wa miaka miwili na Five Stars kila mmoja na kundi hilo linatarajiwa kuingia kambini wakati wowote kwa ajili ya kuandaa albamu mpya.

Kwa upande wake, Shacks alisema kundi lake halina uhasama na kundi lolote na kwamba ujio wao umelenga kuongeza ushindani katika muziki wa taarab na kusaka fedha kwa kutoa vitu vya uhakika.

Alisema tayari wamefanya makubaliano na Jahazi Modern Taarab ili kutochukuliana wasanii. Katika makubaliano hayo, viongozi wa makundi hayo mawili hawatapokea msanii kutoka kundi lingine.

Mbali na kuingia mkataba huo, Shacks alisema makundi hayo mawili yamekubaliana kushirikiana katika kuendeleza muziki wa taarab.

MASHAUZI CLASSIC WAKIWA KAZINI

AISHA Othman wa kundi la Mashauzi Classic akikamua jukwaani wakati wa onyesho lililofanyika kwenye ukumbi wa Mango Garden, Kinondoni, Dar es Salaam mwishoni mwa wiki iliyopita.

ISHA Mashauzi akiwajibika jukwaani wakati wa onyesho hilo

SHABIKI huyu akiwa amepagawa kutokana na utamu wa sauti ya Isha Mashauzi

SAIDA Mashauzi akituzwa na mashabiki wakati wa onyesho hilo

SAIDA Mashauzi akiimba kwa hisia kali, akilalamikia penzi

MASHAUZI APATA KITAMBULISHO CHA UTAIFA

 

 

Rais wa Zanzibar na Mwenyekiti wa Baraza la Mapinduzi Dk Ali Mohamed Shein,akiwa katika picha na msanii wa muziki wa Taarab, Aisha Mashauzi, baada ya kumkabidhi kitambulisho cha Taifa, wakati wa uzinduzi wa zoezi la kukabidhi vitambulisho vya Taifa jana mjini Zanzibar. Mashauzi ni miongoni mwa wananchi kutoka Tanzania Bara waliopewa vitambulisho vyao katika hafla ya utoaji wa Vitambulisho vya Taifa,kwa mara ya kwanza kwa Upande wa Zanzibar,hafla iliyofanyika katika viwanja vya Baraza la Wawakilishi Chukwani Nje ya Mji wa Zanzibar. Picha na Ramadhan Othman,Ikulu.

ISHA MASHAUZI ASHEREHEKEA SIKU YAKE YA KUZALIWA

MUME WANGU ALININYANYASA SANA-SALHA

MWIMBAJI nyota wa kikundi cha taarab cha Dar Modern, Salha Abdalla
amesema moja ya sababu kubwa iliyomfanya aachane na mumewe ni wivu
wa kupindukia.
Akihojiwa katika kipindi cha Mitikisiko ya Pwani, kilichorushwa
hewani na kituo cha redio cha Times FM wiki hii, Salha alisema wivu
aliokuwa nao mumewe, ulisababisha aamini kila alichoelezwa, hata
kama ni cha uongo.
Akitoa mfano, alisema wakati aliposafiri na kikundi chake kwenda
mikoa ya kusini, mumewe alipelekewa maneno ya uongo kwamba alikuwa
na uhusiano wa kimapenzi na msanii mmoja wa kikundi hicho na
akaamini.
Anasema alishangaa wakati wakiwa kwenye ziara hiyo, mumewe alikuwa
akimpigia simu na kumuuliza iwapo amerudiana na kijana huyo, lakini
alikuwa akimkatalia katakata.
"Ni kweli huyo mwanaume alikuwa mpenzi wangi kabla sijaolewa,
lakini wakati tulipokuwa safarini, sikuwahi kuhusiana naye kwa
lolote. Isitoshe alikuwa ameshaoa nami nimeolewa,"alisema Salha.
Aliongeza kuwa, baada ya kurejea kutoka katika ziara yao, mumewe
akaanza kumfanyia vituko nyumbani, ikiwa ni pamoja na kutomuachia
pesa ya matumizi wala kuzungumza naye.
Anasema kila alipomuuliza kulikoni, mumewe alionekana kuwa na
hasira na kuondoka nyumbani alfajiri na kurudi usiku wa manane.
Salha anasema baada ya kuona maji yamemfika shingoni, aliamua
kutengana na mumewe, lakini jambo la kushangaza, wiki zake waliamua
kumpokonya vitu vyote vya nyumbani, hata alivyotunzwa kwenye
sherehe ya kitchen party.
Anasema mmoja wa wifi zake alikuwa akiwapigia simu shoga zake
kuwauliza vitu walivyomtunza wifi yake na alipotajiwa, alimtaka
Salma aviache.
Kwa mujibu wa Salha, kilichokuja kumshtua zaidi ni kuona mumewe
akianzisha uhusiano wa kimapenzi na binamu yake wa kike, ambao hata
hivyo alisema ulidumu kwa siku chache.
"Kuna wakati alinifuata na kuniomba turudiane, lakini nilimkatalia
kwa sababu alishanidhalilisha sana, ikiwa ni pamoja na kunitoa
magazetini, hivyo nisingeweza kurudiana naye,"alisema Salha.
Mwanadada huyo, ambaye kwa sasa anatamba kwa kibao chake cha
Ninauvua ushoga, alisema kwa sasa anaye mpenzi mwingine na
wanatarajia kufunga ndoa hivi karibuni.

LAMANIA WA EAST AFRICAN MELODY AFARIKI DUNIA

MMOJA wa viongozi wa kikundi cha muziki wa taarab cha East African Melody, Lamania Shaaban amefariki dunia.

Lamania alifariki dunia usiku wa kuamkia Jumatano iliyopita akiwa usingizini, nyumbani kwake Mbagala, Dar es Salaam.

Mazishi ya Lamania yalifanyika juzi saa saba mchana Tandika kwa Maguruwe baada ya kuswaliwa katika msikiti wa Sheikh Kilembe.

Mkurugenzi wa East African Melody, Haji Mohamed alisema marehemu Lamania alikuwa akisumbuliwa na ugonjwa wa kupooza kwa zaidi ya miaka mitatu.

Haji alisema Lamania alikuwa nje ya jukwaa la muziki huo kutokana na kusumbuliwa na maradhi hayo kwa muda mrefu.

Enzi za uhai wake, Lamania alikuwa mtunzi wa nyimbo na mpiga gita hodari katika nyimbo za taarab za East African Melody, kikundi kilichoanzishwa miaka ya 1992 huko Dubai katika Falme za Kiarabu.

Kwa mujibu wa Haji, marehemu Lamania alijiunga na East African Melody mwaka 1994 wakati kikundi hicho bado kikiwa Falme za Kiarabu.

Hadi mauti yalipomkuta, Lamania alikuwa mkurugenzi wa muziki wa kikundi hicho, ambacho makao makuu yake ni Mlandege, Zanzibar.

Lamania atakumbukwa kwa tungo zake mwanana, ambazo zilikipatia umaarufu mkubwa kikundi hicho na kukifanya kisiwe na mpinzani miaka ya 1990.

Miongoni mwa tungo zake, ambazo hadi sasa bado zinateka hisia za mashabiki wengi wa muziki huo ni pamoja na Tutabanana hapahapa, Utalijua Jiji, Wa Mungu uwazi, Mwanamke khulka, Nani zaidi, Viumbe wazito, Mama shughuli, Wasio haya wana mji wao.

Haji alisema kifo cha Lamania ni pigo kubwa kwa kikundi chake kutokana na utaalamu aliokuwa nao katika kutunga nyimbo, kupiga ala na pia kushirikiana vyema na wenzake.

"Tumempoteza msanii mzuri, ambaye sio siri kwamba alikuwa nguzo kuu ya utunzi katika kikundi chetu. Iliyobaki ni kumshukuru Mungu na kumuomba ampe malazi mema kwa sababu kifo ni njia ya kila mtu,"alisema.

Marehemu ameacha mke na watoto wanne.

KIKUNDI CHA TAIFA CHA TAARAB CHATIA FORA SHEREHE ZA MAPINDUZI ZANZIBAR

KIKUNDI cha Taifa cha Taarab cha Zanzibar juzi usiku kilitia fora kwa kutoa burdani ya aina yake ikiwa ni sehemu ya shamrashamra za sherehe za kutimiza miaka 49 ya Mapinduzi ya Zanzibar, kutokana na nyimbo zake zilizoisisimua hadhira.

Onyesho hilo la taarab lilifanyika katika ukumbi wa Salama Bwawani, ambapo mgeni rasmi alikuwa Rais wa Zanzibar na Mwenyekiti wa Baraza la Mapinduzi, Dk. Ali Mohamed Shein na mkewe, Mwanamwema Shein na viongozi wengine mbali mbali wa serikali na vyama vya siasa.

Katika onyesho hilo, kikundi hicho kilitumbuiza kwa nyimbo mbali mbali zilizoimbwa na waimbaji wake mahiri na wenye sauti za kumtoa nyoka pangoni huku wapiga ala wakionyesha uhodari wao katika kupiga ala za kiasili.

Kikundi hicho kilianza onyesho hilo kwa wimbo wa 'Rais tunakupenda' ulioimbwa kwa pamoja na Asha Ali kutoka Pemba na Sihaba Juma kutoka Unguja.

Wimbo huo ulikuwa ukimpongeza Dk. Shein kwa juhudi zake katika kusimamia utawala bora na mikakati yake ya kuendeleza kiliko cha kisasa na pia kuongeza bei ya karafuu.

Wimbo huo pia ulimpongeza Dk. Shein kwa kuendelea kusimamia vyema amani na utulivu uliopo nchini, ambao ndiyo muhimili mkubwa wa maendeleo ya kiuchumi, kisiasa na kijamii.

Nyimbo zingine za kikundi hicho zilizotia fora katika onyesho hilo ni ‘Siri ya Moyoni’, ulioimbwa na Fauzia Abdalla, Chaguo ulioimbwa na Saada Mohammed, Mpewa hapokonyeki ulioimbwa na Mtumwa Mbarouk na ’Sema’, ulioimbwa na Fatma Issa.

Mwimbaji mwingine aliyetia fora katika onyesho hilo alikuwa Makame Faki, maarufu kwa jina la Sauti ya Zege, ambaye upigaji wake wa kinanda ulitia fora na kuwafanya watu waliohudhuria waliwazike.

Mkurugenzi wa Kikundi hicho, Iddi Suwedi naye alitia fora baada ya kuimba wimbo wake wa Kinacho wasumbueni, uliotungwa na Mohammed Ahmed wakati Hilda Mohamed alitia fora aliposhuka na kibao chake cha Ninavyokupenda wakati Ali Masoud aliteka hadhira kwa wimbo wake wa Hakika nakupenda.

MZEE YUSSUF, KHADIJA NI VILIO, MASHABIKI WASHIKWA NA SIMANZI

Richard Bukos na Shakoor Jongo

Ndugu wanapogombana shika jembe ukalime, wakipatana nenda ukavune, ngano hiyo ilidhihirika kwa kaka na dada, Mzee Yusuf ‘Mfalme’ na Khadija Yusuf ambao mwaka jana walikosana kiasi cha kunyimana salamu na kusemeana mbovu kwenye vyombo vya habari.

Mzee na Khadija, Ijumaa iliyopita kwenye onesho la uzinduzi wa albamu mpya ya Kundi la Jahazi Modern Taarab, My Valentine, waliangua vilio vilivyoambatana na machozi, walipokuwa wakiimba pamoja wimbo “Undugu Hazina Yetu.”

Ndugu hao wa damu walipokuwa wanaangusha vilio, mashabiki ambao walihudhuria onesho hilo kwenye Ukumbi wa PTA, Temeke, Dar, walitafsiri kuwa mashairi ya wimbo huo yaliwachoma, hivyo kuwakumbusha walipokuwa katika ‘bifu’ zito.

Mwanzoni mwa mwaka jana, Khadija alilikacha Kundi la Jahazi linalomilikiwa na Mzee, kisha kwenda kushiriki kuanzisha Five Stars Modern Taarab na akiwa huko, alidaiwa kumpiga madongo mengi kaka yake.

Katika tukio la Ijumaa, aliyeanza kumwaga machozi ni Khadija kabla ya Mzee kuguswa, naye kuangusha kilio chenye ujazo wa kutosha.
Wakati wawili hao wakilia, baadhi ya watu wa karibu walifika kuwasaidia ili waendelee kuimba.

Hata hivyo, haikuwa rahisi kwa Khadija ambaye machozi yalikuwa mengi kutokana na kuzidiwa na hisia za uchungu, hivyo watu hao kulazimika kumuondoa ukumbini haraka.

Khadija, alipotolewa ukumbini, alipandishwa kwenye gari ambalo liliondoka naye, kabla ya kumrejesha baada ya nusu saa kuendelea kuwajibika jukwaani.
Mwanamuziki huyo, hivi karibuni alirejea Jahazi baada ya kupata suluhu na Mzee, hivyo kuliacha Kundi la Five Stars Taarab kwenye mataa.

Awali, Mzee ndiye aliyeanza kupanda jukwaani, akamkaribisha Khadija na kuanza kuimba Undugu Hazina Yetu lakini wimbo haukufika katikati, wawili hao walikumbatiana kabla ya kuangusha vilio.

Wakizungumza ukumbini hapo, Khadija na Mzee walisema kuwa safari ndefu ya maisha yao iliwakumbusha mbali na kuwataka walimwengu kutoingilia ugomvi wao, kwani wao ni ndugu na hata wakitofautiana, mwisho wa siku wataelewana.

Tukio la Mzee na Khadija likiwa halijapoa, ukumbi wa PTA uliingia kwenye mshikemshike wa aina yake baada ya wanenguaji wawili wa Kundi la Kanga Moja kucharukiana na kupeana mkong’oto.

Tifu la wanenguaji hao ambapo mmoja wao tulimnasa kwa jina la Rehema, lilizua patashika, hasa baada ya kuwa wagumu kuamulika.
Juhudi za walinzi na waratibu wa ‘shoo’ hiyo ya Jahazi, zilisaidia kuwatuliza wanenguaji hao, lakini baada ya kuamuliwa, Rehema aliangusha kilio huku akijiapiza kulipa kisasi.

(Habari, Picha kwa hisani ya gazeti la Amani)

T -MOTO YAZINDUA ALBAMU YA DOMO LA UDAKU KWA STAILI YA AINA YAKE

Mashabiki wa Dar Live wakiwa na furaha ya kuuona mwaka mpya na burudani ya taarab.

Umati ukirindima kwa burudani baada ya kutangaziwa kuwa mwaka mpya 2013 umeingia

Kundi la Kings Modern Taarab likikonga nyoyo za mashabiki kabla ya kuwapisha T Moto.

Kundi la T Moto likizindua albam yake ya ‘Domo la Udaku’.

Mkurugenzi wa T Moto, Amini Salmini (kushoto) na muimbaji wa kundi hilo, Jokha Kassim (aliyevalia

shela kama bi harusi) wakiingia jukwaani kimadaha.

Wapambe walioshika shela kwa nyuma wakinogesha hafla hiyo.

Jokha akikamua.

Wacheza kiduku nao wakimrusha roho ‘bi harusi’ kwa pembeni.

Uzinduzi wa albam ukiendelea.

 Ni shangwe tupu ndani ya Dar Live.

 ‘Bi. Harusi’ akiondolewa jukwaani baada ya kumaliza kufanya makamuzi.

Muimbaji mpya wa T Moto aliyetokea Kings Modern Taarab, Ustaadh Issa Ally, akikamua.

JAHAZI YAPAGAWISHA MASHABIKI USIKU WA DAR LIVE

Mzee Yusuf akiongea na mashabiki wake.

Bi. Leila Rashid akiendeleza makamuzi.

...Khadija Yusuf kazini.

Mwimbaji wa Jahazi Modern Taarab, Fatma Mahmoud 'Mcharuko' akiwapa raha mashabiki.

Sehemu ya nyomi iliyotia timu mahali hapo.

Wapenzi wa taarab wakijiachia kwa raha zao na Jahazi.

Mzee Yusuf akizidi kukoleza burudani ndani ya Dar Live.

KHADIJA KOPA APAGAWISHA MASHABIKI KIVULE

Na Peter Mwenda
MALKIA wa Mipasho nchini, Khadija Kopa na kundi lake cha Tanzania One Theatre (TOT)leo kitatoa shoo kabambe kusherekea sikukuu ya Krismas kwa wakazi wa Kata ya Kivule, Ilala kusherekea sikukuu ya Krismas kwenye ukumbi wa Vegetable Garden Pub.
Akizungumza jana, Kopa alisema kikundi hicho ambacho kitamba na nyimbo kemkem za taarab zinazotingisha katika miundoko ya Pwani ukiwemo Full Stop, Stop in Town na Mjini Chuo Kikuu ameahidi kukonga nyoyo za mashabiki wake katika eneo hilo kwenye sikukuu hiyo.
Alisema TOT taarab imesheheni kila idara ikiwa na wanamuziki wenye uwezo mkubwa wa kupiga taarab yenye mahadhi yanayokubalika akiwepo mkongwe Abdul Misambano, Mwanamtama Amir, Ali Star, Rukia Juma na Kopa Junior anayeimba nyimbo za Omar Kopa.
Mkurugenzi wa Vegetable Garden Pub, Anicety Mkwaya alisema maandalizi ya burudani hiyo imekamilika na zawadi zitatolewa kwa wale watakacheza taarab vizuri na watakaovaa vizuri.

Alisema burudani katika ukumbi huo zinaendelea ambako Januari 29 bendi ya Msondo Ngoma itatoa burudami katika ukumbi huo

ALBAMU MPYA YA JAHAZI KUZINDULIWA DESEMBA 30

KIKUNDI cha taarab cha Jahazi kinatarajia kupakua albamu mpya ya Wasiwasi wako katika onyesho litakalofanyika Desemba 30 mwaka huu kwenye ukumbi wa Travertine, Magomeni, Dar es Salaam.
Akizungumza na blogu ya rusha roho leo, kiongozi wa kundi hilo, Mzee Yusuph amesema maandalizi yote muhimu kwa ajili ya uzinduzi huo yameshakamilika.
Kwa mujibu wa Mzee, albamu hiyo itakuwa na nyimbo sita, ambazo amejigamba kuwa zote zitakuwa moto wa kuotea mbali.
Mzee alisema tayari nyimbo zote sita zimeshakamilisha na baadhi zimeshaanza kupigwa na kusikika kwenye vituo mbalimbali vya redio na televisheni nchini.
Alizitaja nyimbo hizo kuwa ni Wasiwasi wako aliouimba yeye mwenyewe, Kazi mnayo ulioimbwa na Ahmed Ally  na Sitaki Shari ulioimbwa na mahabuba wake, Leila Rashid.
Alizitaja nyimbo nyingine kuwa ni Nipe Stara ulioimbwa na Rahma Machuppa, Hata bado hamjanuna ulioimbwa na Fatma Ally na Mambo bado ulioimbwa na Khadija Yussuf.
Mzee alisema amepania kufanya mabadiliko makubwa kwenye muziki wa taarab ili kuwapa mashabiki ladha tofauti badala ya ile waliyoizoea.
"Sisi kama Jahazi tunapenda tufanye kile kitu mashabiki wanapenda, hivyo tunawaahidi mambo mapya kabisa katika albamu yetu hii mpya,"alisema.
Alisema wakati wa onyesho hilo, wanatarajia kuuza CD na DVD za albamu hiyo kwa mashabiki ili wakapate starehe zaidi majumbani kwao.
Albamu hiyo itakuwa ya tisa tangu kundi la Jahazi lilipoanzishwa mwaka 2006. Albamu zingine zilizopita za kundi hilo ni Tupendane wabaya waulizane, Wagombanao ndio wapatanao, Mpenzi chokolate, Daktari wa mapenzi, Two in one, VIP na My Valentine.

THABITI ABDUL AJA NA HABIBI

HUWEZI kuamini, lakini ndivyo ilivyo. Baada ya kutamba katika utunzi na upapasaji kinanda kwenye nyimbo nyingi za taarab, hatimaye mwanamuziki Thabiti Abdul ameamua kujitosa kwenye uimbaji.
Mwanamuziki huyo, ambaye pia ni mahiri katika muziki wa dansi, ameibuka na kibao kipya kinachokwenda kwa jina la Habibi.
Thabiti ameimba kibao hicho kwa kushirikiana na baadhi ya wasanii wa kundi la Mashauzi Classic, ambalo yeye ni miongoni mwa wakurugenzi wake.
Mpiga kinanda huyo amekiimba kibao hicho kwa umahiri mkubwa, akimlalamikia kimwana, ambaye amekuwa akimtesa kimapenzi.
Wakati Thabiti akijitosa kwenye uimbaji taarab, mwimbaji mkongwe wa fani hiyo, Ally Hemed Star ameibuka na kibao kipya kinachokwenda kwa jina la Ni wewe.
Hii ni mara ya kwanza kwa Ally Star kuibuka na kibao cha taarab baada ya kuwa kimya kwa takriban miaka miwili.